జనం పవర్, కరీంనగర్, నవంబర్ 9:
కరీంనగర్ – వరంగల్ మార్గంలో బస్సుల కొరతతో ప్రయాణికులు తీవ్ర ఇబ్బందులు ఎదుర్కొంటున్నారు. ఉదయాన్నే బస్టాండ్లలో గంటల తరబడి వేచి ఉండే పరిస్థితి నెలకొంది. ఆర్.టీ.సీ అధికారులు షెడ్యూల్లో చూపించిన బస్సుల సంఖ్యకన్నా తక్కువ వాహనాలు రోడ్లపై ఉండటంతో ప్రయాణికులు ఇబ్బందులు పడుతున్నారు.
ఇప్పటికే ఎన్నో ప్రమాదాలు జరిగినప్పటికీ, జాగ్రత్త చర్యలు తీసుకోవడంలో అధికారులు నిర్లక్ష్యంగా వ్యవహరిస్తున్నారని ప్రయాణికులు ఆవేదన వ్యక్తం చేస్తున్నారు. పరిమితిని మించి ప్రయాణికులను ఎక్కించుకుంటూ, డ్రైవర్లు, కండక్టర్లు రిస్క్ తీసుకోవాల్సి వస్తోందని పేర్కొన్నారు. రద్దీ సమయంలో బస్సుల కొరత మరింత తీవ్రంగా మారడంతో, విద్యార్థులు, ఉద్యోగులు, మహిళలు తీవ్ర అసౌకర్యానికి గురవుతున్నారు.
ప్రజలు ఆర్.టీ.సీ ఉన్నతాధికారులను మరిన్ని బస్సులు నడపాలని, భద్రతా చర్యలను పటిష్ఠం చేయాలని కోరుతున్నారు. ప్రయాణ భద్రతకు ప్రాధాన్యతనిస్తూ, పరిమితి మించి రవాణా చేసే పరిస్థితులు నివారించాలని విజ్ఞప్తి చేశారు.
